نماز اسلام کے عبادی احکام میں سے ہے جسے روزانہ پانچ بار معین اوقات میں انجام دینا واجب ہے۔ نماز اسلامی عباتوں میں پہلی عبادت ہے جو پیغمبر اکرمؐ اور آپ کے ماننے والوں پرمکہ مکرمہ میں واجب ہوئی۔ اسی طرح قرآن مجید اور دینی متون میں نماز کو بہت زیادہ اہمیت دی گئی ہے یہاں تک کہ اسے دین کا ستون اور دوسرے اعمال کے قبول ہونے کی شرط قرار دی گئی ہے۔

“نماز” فارسی زبان کا لفظ ہے جسے عربی میں “صلاۃ” کہا جاتا ہے جس کے معنی خم ہونا، پروردگار کی تعظیم اور تکریم کیلئے سر جھکانا، بندگی اور اطاعت کا اظہار کرنا ہے۔

قرآنی اصطلاح میں “صلاۃ” “ص ل و” کے مادے سے دعا کے معنی میں ہے، جس کا جمع “صَلَوات” ہے۔ “صلاۃ” بعض آیات میں دعا کے معنی میں استعمال ہوئی ہے۔ اور نماز کو صلاۃ کہنے کی وجہ بھی یہ ہے کہ جز کا نام کل کے اوپر رکھ دی گئی ہے کیونکہ دعا نماز کا جز ہے۔

نماز ایک ایسی عبادت ہے کہ کوئی بھی شریعت اس سے خالی نہیں تھی لیکن ہر شریعت میں اس کی نوعیت مختلف تھی۔ قرآن میں حضرت حضرت ابراہیم(ع)، حضرت اسماعیل و حضرت اسحاق، حضرت موسی،حضرت زکریا،حضرت عیسی،حضرت شعیباور لقمان حکیم کی نماز کا تذکرہ ملتا ہے۔ روایات میں بھی حضرت آدم اور بہت سارے دیگر انبیاء کے نماز کا تذکرہ ملتا ہے۔

قرآن کی رو سے نماز صرف انسانوں کے ساتھ مختص نہیں بلکہ زمین اور آسمان پر موجود تمام موجودات میں سے ہر ایک مخصوص نماز رکھتا ہے۔

أَ لَمْ‌ تر أَنَّ اللَّہ یسَبِّحُ لَه مَنْ فِی السَّماواتِ وَ الْأَرْضِ وَ الطَّیرُ صَافَّاتٍ کلٌّ قَدْ عَلِمَ صَلاتَه وَ تَسْبیحَه وَ اللَّہ عَلیمٌ بِما یفْعَلُونَ

ترجمہ= کیا تمہیں معلوم نہیں کہ زمین اور آسمان پر موجود ہر مخلوق اور پر پھیلائے پرندے خدا کی تسبح کرتے ہیں؟ یقینا ان میں سے ہر ایک اپنی نماز اور تسبح سے آگاہ ہیں اور خدا وندعالم تمہارے اعمال سے آگاہ ہے۔سورہ نور/۴۱